Se jittella’ kunċert tal-opra L’Alpino ta’ Carlo Diacono nhar il-Ġimgħa 31 ta’ Jannar 2025, fis-7:30pm, fit-Teatru Manoel, grazzi għal kollaborazzjoni bejn l-Orkestra Filarmonika ta’ Malta u l-Aġenzija Kulturali għall-Belt Valletta.
F’konferenza tal-aħbarijiet, il-Kap Eżekuttiv tal-Aġenzija Kulturali għall-Belt Valletta, Catherine Tabone tenniet: “Din il-produzzjoni għandha post speċjali f’qalbi, billi tiċċelebra lil Carlo Diacono—wieħed mill-kompożituri l-aktar sinifikanti ta’ Malta. Wara s-suċċess tal-Aġenzija Kulturali għall-Belt Valletta fil-produzzjoni tar-Requiem ta’ Verdi f’Novembru li għadda, L’Alpino tkompli t-tradizzjoni tagħna ta’ eċċellenza artistika filwaqt li twiegħed li jwassal kull l-isfumatura emozzjonali tal-opra ta’ Diacono li tant hi rikka fil-melodija u l-armoniji kromatiċi tagħha.”
Il-Kap Eżekuttiv tal-Orkestra Filarmonika ta’ Malta, Vanessa Mangion qalet li “L-opra L’Alpino ta’ Carlo Diacono għandha għeruq sodi fil-kuntest storiku tal-Ewwel Gwerra Dinjija, kunflitt li biddel l-Ewropa u ħasad miljuni ta’ ħajjiet. In-narrattiva tal-opra tiżvolġi fl-isfond tal-battalji storiċi li wettqet l-armata Taljana kontra l-Austro-Ungeriżi u l-Ġermaniżi fl-Alpi u fid-Dolomiti. Dawn il-battalji kienu kkaratterizzati minn kundizzjonijiet ħorox, numru ta’ vittmi li dejjem jiżdied, u qliegħ strateġiku minimu. L-opra sservi bħala ġieħ għar-reżiljenza u s-sagrifiċċji ta’ dawk li ġġieldu u waqgħu f’wieħed mill-areni l-aktar koroh tal-Ewwel Gwerra Dinjija billi tgħaqqad il-ġlidiet personali tas-suldati Alpini mal-kuntest storiku usa’ tal-kampanja tal-Italja”
Taħt id-direzzjoni tas-Surmast Michael Laus, Direttur Residenti tal-Orkestra Filarmonika ta’ Malta, dan il-kunċert se jagħti l-ħajja lill-mużika orkestrata b’mod għani ta’ Diacono miktuba fl-istil verismo. Din ir-rappreżentazzjoni tgħaqqad l-eleganza tal-istili operistiċi tradizzjonali mar-reżonanza emozzjonali profonda. Barra minn hekk din tgħaqqad influwenzi mill-opra Taljana, Franċiża u Ġermaniża f’xogħol drammatiku u indimentikabbli.
Is-Surmast Michael Laus fil-fatt qal li “Ninsab ferħan li għandi l-opportunità li nwettaq dan ix-xogħol tant importanti mill-wirt operistiku rikk Malti tal-bidu tas-seklu għoxrin – xogħol li ilu ma jindaqq b’mod sħiħ għal kważi tmenin sena. Jien ċert li din se tkun esperjenza indimentikabbli kemm għal dawk li jħobbu l-opra kif ukoll għal dawk ġodda.”
Id-Direttur tal-Cappella Diacono, is-Surmast Ray Sciberras, tkellem dwar ix-xogħol tiegħu biex ġiet diġitizzata l-opera kollha li fiha tliet atti, minn kopja oriġinali tal-1918, miktuba bl-idejn u li partijiet minnha kienu mgħottijin. Dan ix-xogħol sar f’diskussjoni ma’ Carlo Baldini mill-Accademia Nazionale di Santa Cecilia.
“Dan huwa xogħol li għandna nkunu kburin bih għax ftit kompożituri Maltin jiktbu l-opera,” tenna Sciberras. “Għalkemm Diacono kien prolifiku ħafna fil-mużika tal-festi għall-orkestra u għall-baned, L’Alpino hija l-unika opera tiegħu li għandha intermezzo fin u delikat u tintemm bil-Coro dei Montanari fejn tinħoloq atmosfera liema bħalha u għalhekk din hija esperjenza li tassew ma għandhiex tintilef.”
Il-kast jinkludi l-aqwa talent vokali Malti: Is-Soprani Miriam Cauchi u Nicola Said bħala Nella u Anna Rosa rispettivament, it-tenur Alan Sciberras bħala Enzo, il-baxx baritone Louis Andrew Cassar bħala Andrea, u l-baxx Noel Galea bħala Franz. Mariaconcetta Calafiore u Anita Vella Bondin iżidu l-profondità bħala d-Due Compagne. Huma se jkunu ikkumplimentati mill-Kor Goldberg Ensemble, li jsaħħaħ it-tessut mużikali tas-serata.
Il-biljetti għal L’Alpino jvarjaw minn €9 sa €30. Irriserva postok fuq teatrumanoel.mt/event/lalpino/ jew billi ċempel (+356) 21246389.
L’Alpino qed tittella’ grazzi għall-kollaborazzjoni bejn l-Aġenzija Kulturali għall-Belt Valletta u l-Orkestra Filarmonika ta’ Malta.
