L-Aġenzija Kulturali għall-Belt Valletta (VCA) u l-Kunsill Lokali tal-Belt Valletta ffirmaw Memorandum ta’ Ftehim (MoU) biex jistabbilixxu Maker Club li jsir kull xahar għall-abitanti tal-Belt Valletta, fil-Valletta Design Cluster.
Din l-inizjattiva tifforma parti mill-impenn kontinwu taż-żewġ entitajiet biex jinvestu fil-kreattività komunitarja, it-tagħlim tul il-ħajja, u l-parteċipazzjoni kulturali aċċessibbli fiċ-ċentru tal-kapitali.
Il-Memorandum ta’ Ftehim ġie ffirmat mill-Uffiċjal Kap Eżekuttiv tal-Aġenzija Kulturali għall-Belt Valletta, Catherine Tabone, u mis-Sindku tal-Belt Valletta, Olaf McKay.
Waqt li indirizzat il-midja, l-Uffiċjal Kap Eżekuttiv tal-Aġenzija Kulturali għall-Belt Valletta, Catherine Tabone, qalet li “il-Valletta Design Cluster inħoloq bħala spazju għall-ideat, il-ħolqien u l-komunità. Permezz ta’ din il-kollaborazzjoni, qed nagħtu lill-abitanti tal-Belt — żgħar u kbar — l-għodod biex jesploraw, jitgħallmu u jingħaqdu. Il-Maker Club huwa mezz sempliċi imma qawwi biex inżommu l-ispirtu kreattiv tal-Belt ħaj u dejjem jikber.”
Is-Sindku tal-Belt Valletta, Olaf McKay, qal li “din l-inizjattiva hija dwar in-nies. Toffri lill-anzjani tagħna l-opportunità li jibqgħu attivi u lit-tfal iċ-ċans li jitgħallmu permezz tal-kreattività prattika. Jiena kburi li bħala Kunsill Lokali qed naħdmu id f’id mal-Aġenzija Kulturali għall-Belt Valletta biex inwasslu dan il-proġett għall-komunità tagħna. Il-Maker Club se jkun spazju fejn ġenerazzjonijiet jiltaqgħu, jaqsmu u jikbru flimkien — proprju hawnhekk fiċ-ċentru tal-belt tagħna.”
Il-Kunsill Lokali tal-Belt Valletta u l-Aġenzija jiddikjaraw li huma impenjati, fost affarijiet oħra, li jikkollaboraw biex jistabbilixxu dan il-Msker Club, immirat b’mod partikolari lejn residenti anzjani u familji bi tfal bejn it-8 u l-15-il sena. L-inizjattiva għandha l-għan li toħloq spazju kreattiv u soċjali għall-anzjani biex jipparteċipaw f’attivitajiet prattiċi; tintroduċi lit-tfal għall-artiġjanat permezz ta’ workshops interattivi, u tħeġġeġ it-tagħlim interġenerazzjonali permezz ta’ attivitajiet konġunti li jippromwovu d-djalogu, il-ħiliet kondiviżi u l-għaqda komunitarja.
Il-Kunsill Lokali tal-Belt Valletta se jappoġġja l-programm billi jinvolvi lir-residenti u jassisti bil-faċilitazzjoni tal-aċċess, filwaqt li l-Aġenzija, permess tal-Valletta Design Cluster, se tipprovdi l-ispazju, l-għodod u l-faċilitazzjoni, kif stipulat fit-termini tal-Memorandum ta’ Ftehim.
Il-Maker Club se joffri sessjonijiet prattiċi u workshops kollaborattivi f’oqsma bħad-disinn, l-artiġjanat, il-fabbrikazzjoni diġitali, is-sostenibbiltà u l-innovazzjoni, billi juża l-faċilitajiet kompluti tal-Valletta Design Cluster. Il-programm huwa mfassal biex ikun inklussiv, immexxi mill-komunità u interġenerazzjonali, li joffri lill-abitanti tal-Belt il-possibbiltà li jesploraw ħiliet ġodda u joħolqu flimkien f’ambjent ta’ sostenn u milqugħ.
Għal aktar dettalji, żur is-sit elettroniku u l-paġna ta’ Facebook tal-Aġenzija Kulturali għall-Belt Valletta.
