Tlieta mill-aqwa tenuri Maltin tal-ġenerazzjoni tagħhom, Alan Sciberras, Cliff Zammit Stevens u Nico Darmanin se jkunu qed jieħdu sehem fil-kunċert Opera in the Capital – The Three Tenors.
Dan il-kunċert, taħt id-direzzjoni mużikali tal-Maestro Michael Laus u l-Maestro Ryan Paul Abela, se jkun qed jittella’ nhar l-Erbgħa 28 ta’ Ġunju fi Pjazza San Ġorġ, fid-9pm. Biljetti minn fuq showshappening.com.
Dan ġie mħabbar mill-Ministru għall-Wirt Nazzjonali, l-Arti u l-Gvern Lokali Owen Bonnici, flimkien maċ-Chairman tal-Aġenzija Kulturali tal-Belt Valletta Jason Micallef u l-Kap Eżekuttiv tal-Aġenzija Kulturali tal-Belt Valletta Catherine Tabone.
Il-Ministru Bonnici esprima s-sodisfazzjoni tiegħu dwar ir-ritorn ta’ dan il-kunċert fil-Belt Valletta, filwaqt li enfasizza li hemm stennija mill-pubbliku għal dan l-avveniment. Huwa ddeskriva dan il-kunċert bħala ċelebrazzjoni mill-isbaħ tal-ħila vokali u l-eċċellenza mużikali, filwaqt li nnota li l-wirjiet mogħtija minn dawn it-tenuri huma rinomati għall-kapaċità tagħhom.
Il-Ministru Bonnici saħaq li dan l-avveniment mhux biss joffri lejla ta’ divertiment ta’ klassi dinjija iżda wkoll jagħti ġieħ lill-wirt kulturali għani ta’ Malta. “Meta nospitaw spettaklu daqshekk prestiġjuż, ir-reputazzjoni ta’ Malta bħala destinazzjoni ewlenija għall-mużika u l-arti tkompli tissaħħaħ,” temm jgħid il-Ministru Bonnici.
Iċ-Chairman Jason Micallef qal, “Dan il-kunċert huwa wieħed fost il-ħafna avvenimenti ta’ kwalità għolja li l-Aġenzija Kulturali għall-Belt Valletta ttella’ sena wara l-oħra, fil-qalba tal-Belt Kapitali tagħna. Filwaqt li niċċelebraw is-sbuħija ta’ din il-belt, b’dan il-kunċert qegħdin ukoll inwieġbu għad-domanda tant kbira li hawn għal avvenimenti fil-miftuħ.” Is-Sur Micallef ħabbar ukoll li din is-sena mat-tliet tenuri se tkun qed tingħaqad ukoll il-kantanta Maltija Chiara.
Il-Kap Eżekuttiv Catherine Tabone qalet, “Dan l-avveniment mhux biss se jipprovdi lejla pjaċevoli fejn il-pubbliku se jkun jista’ jesperjenza mill-qrib l-opra iżda se jservi wkoll bħala pjattaforma importanti għat-talent lokali. It-tenuri ta’ dan il-kunċert, ilkoll kemm huma bil-karatteristiċi vokali differenti tagħhom, jirrappreżentaw dak li jista’ jinkiseb permezz tat-talent, ta’ xogħol iebes u ta’ impenn liema bħalu. Inħarsu ’l quddiem sabiex naraw Pjazza San Ġorġ ippakkjata bin-nies jitpaxxew bl-ilħna ta’ dawn it-tenuri.”
Opera in the Capital – The Three Tenors se tkun lejla mżewqa b’melodiji klassiċi u operistiċi famużi mad-dinja kollha. Dan huwa t-tielet kunċert ta’ din is-serje, li sena wara l-oħra baqa’ jikseb suċċess. Ir-repertorju li ser ikantaw it-tenuri huwa wieħed mill-iżjed melodiku u jinkludi ħafna kanzunetti magħrufa.
Għal aktar informazzjoni żur il-paġna ta’ Facebook tal-aġenzija u s-sit vca.gov.mt.
