AVVIŻ DWAR IL-BILJETTI TA’ CINEMA CITY
Minħabba l-kundizzjonijiet tat-temp, il-films li kellhom jintwerew ilejla, it-Tnejn 5 ta’ Ġunju (Inglourious Basterds) u għada t-Tlieta 6 ta’ Ġunju (The Book of Life), ser jiġu posposti għall-Ħadd u t-Tnejn li ġej.
Niskużaw ruħna għal kull inkonvenjent.
Il-films l-oħra kollha ser jintwerew kif kien skedat oriġinarjament. Segwu dan is-sit għal aktar aġġornamenti.
Jekk jogħġbok innota li m’hemmx aktar biljetti disponibbli għal dan l-aveniment.
*********************************************************************************************************************************
Cinema City, l-avveniment annwali ta’ wiri ta’ films fil-miftuħ, se jirritorna bejn is-7 u t-12 ta’ Ġunju 2023 fi Ġnien Laparelli, il-Belt Valletta. Dan ħabbru l-Ministru għall-Wirt Nazzjonali, l-Arti u l-Gvern Lokali Owen Bonnici meta kien qed iniedi dan l-avveniment li huwa mtella’ mill-Aġenzija Kulturali għall-Belt Valletta.
“Dan l-avveniment jibni fuq l-impenn tagħna li niċċelebraw il-kultura fil-ġeneri diversi tagħha u nibqgħu nagħtu sostenn lill-artisti u, f’dan il-każ, lill-industrija tal-film. Kommessi li nkomplu nkabbru l-attivitajiet kulturali fil-Belt Kapitali u fid-diversi postijiet f’pajjiżna,” tenna l-Ministru Bonnici.
Iċ-Chairman tal-Aġenzija Kulturali għall-Belt Valletta Jason Micallef qal li l-Aġenzija hija kommessa li tkompli bir-riġenerazzjoni ekonomika, soċjali u kulturali tal-Belt Valletta. Kompla li Cinema City, li huwa ċelebrazzjoni ta’ wiri ta’ films fil-miftuħ, inkluż produzzjonijiet Maltin, ikompli jibni fuq is-suċċess tal-Valletta Green Festival li sar ftit jiem ilu.
L-edizzjoni ta’ din is-sena ta’ Cinema City tinkludi temi varji li ġew magħżula minn voluntiera, fejn intalbu jaraw numru ta’ films li jaqgħu taħt ġeneri differenti u li minnhom ġew magħżula s-sitt films li se jintwerew. L-udjenza tista’ tgawdi dan il-wiri ta’ films fil-miftuħ, mingħajr ħlas.
Il-films se jintwerew fid-9pm skont l-iskeda li ġejja:
Skeda Aġġornata:
7 ta’ Ġunju – Blood on the Crown (12A)
8 ta’ Ġunju – Merjen (18)
9 ta’ Ġunju – Sideways (16)
10 ta’ Ġunju – Back to the Future (I volume) – (U)
11 ta’ Ġunju – The Book of Life (U)
12 ta’ Ġunju – Inglourious Basterds – (18)
Il-biljetti jistgħu jinkisbu mill-Aġenzija Kulturali għall-Belt Valletta fi Triq ir-Repubblika, il-Belt Valletta, bil-preżentazzjoni tal-Karta tal-Identità. Il-postijiet huma limitati u fuq bażi ta’ first come, first served. Għal aktar informazzjoni, ibgħat email lill-Aġenzija fuq [email protected] jew żur vca.gov.mt.
