Sejħa għall-applikazzjonijiet għall-qadi ta’ dmirijiet bħala Uffiċjal Eżekuttiv (Programmar u Produzzjoni) fl-Aġenzija Kulturali tal-Belt Valletta (VCA)

Permess tal-Jobsplus Nru 60/2023

Nomenklaturi li jindikaw is-sess maskili jinkludu wkoll is-sess femminili

1. Il-VCA hija entità tal-Gvern inkarigata li ssostni u ssaħħaħ il-ħajja kulturali vibranti tal-Belt Kapitali permezz tal-ħolqien ta’ programm annwali ta’ avvenimenti kreattivi żviluppati b’kollaborazzjoni ma’ artisti u Organizzazzjonijiet Kulturali Pubbliċi oħra. Legat tal-Fondazzjoni Valletta 2018, il-VCA ssostni wkoll standards ta’ eċċellenza fil-koordinazzjoni u l-organizzazzjoni ta’ avvenimenti kulturali fil-Belt, filwaqt li tinkoraġġixxi aċċess u parteċipazzjoni minn udjenza diversa.

1.1. L-Aġenzija qed tfittex applikazzjonijiet minn kandidati xierqa biex iwettqu dmirijiet bħala Uffiċjal Eżekuttiv (Programmar u Produzzjoni) kif imsemmija hawn taħt. Din il-kariga hija fuq bażi full-time u hija soġġetta għal perjodu ta’ prova ta’ tnax-il (12) xahar.

2. L-Uffiċjal Eżekuttiv (Programmar u Produzzjoni) jifforma parti mid-Dipartiment tal-Ipprogrammar tal-VCA u se jkun qed jaħdem taħt is-superviżjoni tal-Kap tal-Ipprogrammar u l-Produzzjoni u s-CEO.

Id-dmirijiet ewlenin tal-Uffiċjal Eżekuttiv tal-Ipprogrammar u l-Produzzjoni huma li:

• Jidentifika, jiżviluppa u jiffinalizza l-implimentazzjoni ta’ proġetti/avvenimenti jew fergħat ta’ proġetti bħala parti mill-programm tal-Aġenzija;
• Jikkontribwixxi għall-iżvilupp tal-istrateġija tal-Ipprogrammar;
• Jissorvelja l-proċess ġenerali tal-ksib tal-proġetti assenjati u jwettaq il-ksib skont ir-Regolamenti tal-Akkwist Pubbliku kif u meta jkun meħtieġ;
• Jgħin, meta meħtieġ, fil-produzzjoni tal-proġetti;
• Jikkoordina mal-persunal, is-superjuri u l-partijiet interessati dwar il-kwistjonijiet kollha relatati mal-proġetti/avvenimenti jew linji ta’ proġetti li għalihom ikunu responsabbli;
• Jgħin fit-tħejjija u l-koordinazzjoni tal-proċessi amministrattivi kollha (inklużi l-kuntratti u l-produzzjoni meħtieġa) għall-avveniment/proġetti assenjati li jiffurmaw parti mill-programm tal-Aġenzija, bil-ħsieb li jinkiseb l-ogħla impatt u tiġi żgurata s-sostenibbiltà;
• Jissorvelja u jimmaniġġja l-pjan ta’ żmien u l-baġits ta’ proġetti/avvenimenti jew fergħat ta’ proġetti;
• Iħejji, permezz ta’ ħidma ma’ korpi kemm interni kif ukoll esterni, inizjattivi ġodda;
• Iwettaq riċerka kif assenjat mill-Kap tal-Ipprogrammar u l-Produzzjoni u jipprovdi rakkomandazzjonijiet xierqa;
• Iżomm sistema ta’ rappurtar dettaljata li tirrigrada l-progress tal-proġetti u l-pjanijiet ta’ produzzjoni u l-prestazzjonijiet;
• Iwettaq kwalunkwe dmir ieħor kif jista’ jiġi assenjat mill-Kap Eżekuttiv tal-VCA jew rappreżentant tiegħu/tagħha.

3. Is-salarju marbut mal-pożizzjoni ta’ Eżekuttiv tal-Ipprogrammar u l-Produzzjoni ser ikun ta’ €26,438 fis-sena fi Grad 5 fi ħdan il-Grad u l-Istruttura tas-Salarju tal-Organizzazzjonijiet Kulturali Pubbliċi u b’żieda annwali ta’ €531 sa massimu ta’ €29,625 (fl-2022).

Il-kandidat magħżul ser ikun intitolat għal Disturbance Allowance ta’ massimu ta’ 15% kull sena. Barra minn hekk, Performance Bonus sa massimu ta’ 10% fis-sena huwa inkluż fil-pakkett finanzjarju.

4. L-applikanti eliġibbli ser jiġu intervistati minn Bord tal-Għażla biex jivvaluta l-adegwatezza tagħhom biex iwettqu d-dmirijiet imsemmija hawn fuq.

4.1. Kwalifika fil-Grad ta’ Masters fil-Livell MQF 7 (soġġetta għal minimu ta’ 60 Kreditu ECTS/ECVET, jew ekwivalenti, fir-rigward ta’ programmi li jibdew minn Ottubru 2008) f’suġġett relatat mal-Management / Ix-Xjenzi Soċjali / L-Istudji Umanistiċi, flimkien ma’ sena (1) esperjenza ta’ xogħol rilevanti

jew

Kwalifika f’livell ta’ Baċellerat fil-Livell MQF 6 (soġġetta għal minimu ta’ 180 Kreditu ECTS/ECVET, jew ekwivalenti, fir-rigward ta’ programmi li jibdew minn Ottubru 2003) f’suġġett relatat mal-Management / Xjenzi Soċjali / l-Istudji Umanistiċi, flimkien ma’ tliet (3) snin esperjenza ta’ xogħol rilevanti.

4.2. Il-kwalifiki u l-esperjenza mitluba għandhom ikunu sostnuti minn ċertifikati u/jew testimonjanzi, li kopji tagħhom għandhom ikunu mehmuża mal-applikazzjoni jew mibgħuta separatament lill-Kap tal-HR Management fil-Valletta Cultural Agency, Exchange Buildings, Triq ir-Repubblika, il-Belt Valletta jew b’email fuq hr@vca.gov.mt sa mhux aktar tard mid-data u l-ħin tal-għeluq.

4.3. Iċ-ċertifikati oriġinali u/jew it-testimonjanzi għandhom jiġu ppreżentati għall-verifika waqt l-intervista.

5. Persuni reġistrati mal-Kummissjoni Nazzjonali Persuni b’Diżabilità (NCPD) jistgħu jingħataw akkomodazzjoni raġonevoli skont it-Taqsima 7 tal-Opportunitajiet Indaqs (Persuni b’Diżabilità) (Kapitolu 413 tal-Liġijiet ta’ Malta), anke jekk ma jissodisfawx bis-sħiħ ir-rekwiżiti għal din il-kariga, sakemm ikunu jistgħu jwettqu, essenzjalment, id-dmirijiet relatati mal-pożizzjoni li għaliha saret applikazzjoni.

5.1. Ir-rappreżentazzjonijiet f’termini ta’ din il-klawżola għandhom jiġu mehmuża mal-formola tal-applikazzjoni u sostnuti b’dokumenti rilevanti li jridu jinkludu wkoll evidenza dokumentata tar-reġistrazzjoni mal-NCPD. Għandhom jingħataw ġustifikazzjonijiet raġunati biex jissostanzjaw in-nuqqas ta’ rekwiżiti ta’ eliġibilità sħaħ u għaliex huma mistħoqqa kunsiderazzjonijiet motivati.

5.2. Il-korrispondenza kollha għandha tiġi indirizzata lill-entità u kkupjata lill-NCPD.

6. Applikazzjonijiet appoġġjati mid-dokumentazzjoni meħtieġa, li għandhom jinkludu ittra ta’ motivazzjoni, Curriculum Vitae dettaljat, u fejn applikabbli Formola tar-Rekord tas-Servizz u l-Liv (GP 47), għandhom jaslu għand il-Kap tal-Immaniġġjar tar-Riżorsi Umani, bl-idejn jew bil-posta fl-indirizz Valletta Cultural Agency, Exchange Buildings, Triq ir-Repubblika, il-Belt Valletta sa mhux aktar tard minn nofsinhar (Ħin tal-Ewropa Ċentrali) tas-17 ta’ Frar 2023. Fil-każ ta’ impjegati tas-settur Pubbliku, dawn għandhom jippreżentaw ir-rekords tagħhom tal-leave imħallas/leave mhux imħallas/liv tal-mard għall-aħħar erba’ (4) snin, inkluż kull rekord ta’ kwalunkwe azzjoni dixxiplinarja li setgħet kienet meħuda (fin-nuqqas ta’ tali rekords ikun mifhum li qatt ma ttieħdet ebda azzjoni dixxiplinarja). Kopji skennjati tal-applikazzjoni u d-dokumentazzjoni rilevanti mibgħuta elettronikament fuq hr@vca.gov.mt huma aċċettati.

6.1. L-applikazzjonijiet riċevuti ser jiġu konfermati b’irċevuta.

7. L-uffiċjal magħżul ser ikun meħtieġ jiffirma kuntratt li juri l-impenn tiegħu lejn il-pożizzjoni li għaliha jintgħażel.