Fl-10 u fit-13 ta’ Diċembru, hekk kif idoqqu l-11am, Pjazza Ħelsien ser tieħu xeħta differenti b’sorpriża mhux tas-soltu hekk kif iż-żeffiena ta’ Dancel Dance Studio joħolqu spettaklu u tbissima liema bħalha!

Hekk kif kollox ikunu miexi b’mod norali, il-qalba tal-Belt Valletta tinfexx f’żifna spontanja propju mat-tokki tal-arloġġ! It-tim dinamiku ta’ 60 żeffien huwa mistenni joħloq splużjoni ta’ enerġija u kreattività fi Pjazza Ħelsien.

Minn melodiji tal-Milied sa siltiet klassiċi li jġiegħluk tagħmel xi pass jew tnejn, iż-żeffiena tagħna huma lesti għal prestazzjoni ta’ sitt minuti li żgur tagħti tbissima lil dawk kollha li jinzertaw fil-qrib. B’melodiji magħrufa u koreografija vibranti, iż-żeffiena tagħna żgur li jibdlu l-ordinarju fi straordinarju filwaqt li jxerrdu l-ferħ, il-pożittività u s-sens ta’ għaqda.

Lesti biex tingħaqadu f’dan l-ispirtu ta’ sorpriża u ta’ komunità? Dan l-avveniment mhux ta’ min jitilfu!

Żur il-paġni tal-Aħbarijiet tal-Aġenzija Kulturali għall-Belt Valletta u l-paġna ta’ Facebook għal aktar informazzjoni.