L-Aġenzija Kulturali għall-Belt Valletta  ser ittella’ l-esibizzjoni “It’s All Paperwork” ta’ Antoine Farrugia.

Ix-xogħlijiet f’din l-esibizzjoni ser ikunu qed juru trasformazzjoni artistika tal-ġebla Maltija, f’mod li wieħed jista’ kważi jarahom bħala folji.

F’din l-esibizzjoni wieħed mhux se jkun qiegħed jara xogħol magħmul bil-karti iżda minflok se jkun qed jara skulturi fuq ġebla tal-franka li tant huwa maħdum b’reqqa u bi preċiżjoni li mal-ewwel daqqa t’għajn jagħti l-impressjoni li x-xogħol bil-karti. Għalhekk, it-terminu ‘trompe l’oeil’ li normalment jintuża biex jiddeskrivi pitturi li tant huma realistiċi li kapaċi li jqarrqu b’dak li jkun, huwa adattat ħafna għal din l-esibizzjoni.

Dan huwa xhieda tat-talent straordinarju tal-artist Antoine Farrugia. Farrugia huwa mill-Imqabba u kif kulħadd jaf apparti l-logħob tan-nar, il-franka hija xi ħaġa importanti ħafna għal dan ir-raħal, l-aktar minħabba l-istorja ta’ xogħol fil-barrieri f’dawn l-inħawi. Fil-fatt missier Antoine u anki membri oħra fil-familja tiegħu kienu jaħdmu fil-barrieri. Dan il-fattur għen ħafna sabiex irawwem f’Antoine mħabba lejn il-ġebla tal-franka.

Għalkemm l-imħabba lejn l-arti bdiet minn età żgħira, Farrugia beda jagħmel xogħol tal-iskultura wara li kien għalaq it-tletin u t-talent tiegħu kompla jevolvi bi gwida minn Anton Grech, meta beda t-taħriġ formali fl-iskola tal-arti fejn hemm kiseb ukoll diploma.

Ir-riċerka u x-xogħlijiet fuq din it-tema tax-xogħlijiet hekk imsejħa “karti” bdew madwar ħames snin ilu u issa Farrugia ħerqan li jesibixxi x-xogħol artistiku oriġinali tiegħu wara tant ħidma, f’din l-esibizzjoni prestiġjuża.

Din l-esibizzjoni se tkun qed issir taħt il-patroċinju tal-Onor. Anġlu Farrugia M.P. Speaker tal-Parlament ta’ Malta.