L-Aġenzija Kulturali għall-Belt Valletta bi pjaċir tħabbar produzzjoni tar-Requiem ta’ Giuseppe Verdi fit-23 ta’ Novembru fis-19:30pm f’Dar il-Mediterran għall-Konferenzi. L-ewwel darba li ttella’ dan il-kapolavur mużikali kien 50 sena ilu, u llum ir-Requiem ta’ Verdi hija fost l-aktar xogħlijiet korali ta’ prestiġju fil-qasam tal-mużika klassika. Ir-Requiem inkitbet b’tifkira tal-poeta Taljan Alessandro Manzoni, u hija ċċelebrata għall-qawwa drammatika u l-profondità emozzjonali tagħha.
Din il-produzzjoni se tinkludi l-parteċipazzjoni tal-Kor prestiġjuż tal-Accademia Nazionale di Santa Cecilia ta’ Ruma, magħmul minn 60 korist, li se jingħaqdu mal-Orkestra Filarmonika ta’ Malta u KorMalta, taħt id-direzzjoni tas-surmast ta’ fama internazzjonali Pier Giorgio Morandi.
Ir-Requiem ta’ Verdi se jkollha wkoll formazzjoni ta’ solisti eċċellenti li tinkludi s-sopran Anna Pirozzi, wiċċ familjari fl-aktar teatri tal-opra prestiġjużi tal-Ewropa, bħalma huma r-Royal Opera House ta’ Covent Garden, it-Teatro dell’Opera di Roma, l-Istaatsoper ta’ Vjenna, il-Paris Opera, u La Fenice f’Venezja, fost l-oħrajn. Pirozzi se tingħaqad mal-mezzosopran Maltija Marvic Monreal, li s-sena l-oħra ddebuttat fir-Royal Opera House u aktar reċentement kantat bħala solista fi prestazzjoni tal-iStabat Mater ta’ Dvorak mal-Berlin Philharmonic, u t-tenur stabbilit Malti Alan Sciberras, li fl-aħħar snin kanta rwoli fi produzzjonijiet operistiċi fl-Italja u fil-gżejjer Maltin, kif ukoll fl-iStabat Mater ta’ Rossini mal-Orkestra Filarmonika ta’ Malta. Ir-rwol tal-baxx se jitkanta mill-baxx-baritonu Żvediż John Lundgren, magħruf internazzjonalment għall-vuċi drammatika tiegħu sinonima mar-rwoli operistiċi ta’ Scarpia fit-Tosca ta’ Puccini, Pizzaro fil-Fidelio ta’ Beethoven, u diversi rwoli fir-Ring Cycle ta’ Wagner.
Dan l-avveniment jippreżenta opportunità unika għal dawk li jħobbu l-mużika biex jesperjenzaw ir-Requiem ta’ Verdi interpretata minn uħud mill-aqwa artisti fid-dinja.
Il-biljetti għal dan l-avveniment mużikali notevoli issa huma disponibbli fuq: https://www.showshappening.com/Valletta-Cultural-Agency/VERDI-REQUIEM
