Il-Valletta Design Cluster se jospita l-ewwel edizzjoni ta’ Tinkering Days nhar is-Sibt, 14 ta’ Settembru. Dan l-avveniment innovattiv, ispirat mill-moviment globali magħruf bħala Maker Movement, jiċċelebra l-kreattività u l-passjoni tal-makers lokali fosthom persuni kreattivi, artiġjani u persuni ta’ kull età kurjużi dwar id-DIY u d-disinn.
Tinkering Days se tinkludi firxa wiesgħa ta’ attivitajiet bħal workshops tat-tisjir, open studios mill-artisti residenti, attivitajiet interattivi għat-tfal li jinkludu LEGO robotics, wirjiet interattivi, installazzjonijiet bil-ħsejjes u d-dawl, u ħafna aktar.
Tinkering Days huwa miftuħ għal kulħadd, irrispettivament mill-età jew mill-liema qasam ġejjin. L-għan ewlieni huwa li jġib flimkien nies li għandhom sens ta’ kurżità u interess f’passatempi, is-snajja, l-arti, id-disinn, l-ikel, u t-teknoloġija.
Dan l-avveniment huwa open day li joffri opportunità unika biex wieħed jesplora l-Valletta Design Cluster b’diversi attivitajiet u wirjiet li jseħħu fid-diversi żoni tal-binja. Il-pubbliku jista’ jżur stands differenti, jitkellem mal-makers dwar ix-xogħol tagħhom, u jieħu sehem fl-attivitajiet diversi. Se jkun hemm bosta studios miftuħin għall-pubbliku kif ukoll installazzjonijiet interattivi filwaqt li l-ġnien ta’ fuq il-bejt se jkunu wkoll disponibbli għall-viżitaturi.
Id-dħul għal Tinkering Days huwa b’xejn u m’hemmx bżonn ta’ biljett.
Se jkun hemm ikel u xorb li jinbiegħ mill-membri tal-Valletta Design Cluster fosthom pasti Franċiżi ta’ Geoffrey Barault, ikliet mill-kċina ta’ SAHHA, u birer artiġjanali minn Huskie Craft Beer Company. Il-kok Mark Camilleri se jmexxi workshop dwar il-ħobż u l-butir fil-Kċina tat-Tagħlim tal-Valletta Design Cluster.
Il-programm jinkludi varjetà ta’ persuni kreattivi, fosthom artisti, disinjaturi u makers li jinkludu lil Anna Calleja, Mark Borg, Beluga Corp, Heidi u Tina’s Mosaic Start up, Francesca Mercieca, no.site.studio, Dennis Orlov, Marica Lewis, Mike Spiteri, Anton Abela, Wicked Comics, Beauty One Innovation, The Secret Rose, Dolphin Club, Russell Smith, Rota, Rupture, I+A, it-tim tar-robotika tal-MCAST, u Community Crafts mill-Valletta Floriana Community Services (FSWS).
Għal aktar informazzjoni dwar Tinkering Days, żur il-websajt tal-Valletta Cultural Agency fuq (https://www.vca.gov.mt/en/events/tinkering-days), żur il-paġni tal-midja soċjali tal-Valletta Design Cluster, ċempel jew żur il-Valletta Design Cluster bejn it-8am u l-2pm bejn it-Tnejn u l-Ġimgħa.
Il-Valletta Design Cluster huwa ċentru ddedikat għat-trawwim tal-kollaborazzjoni kreattiva u l-innovazzjoni. Bħala hub għad-disinjaturi, artisti u produtturi, il-Valletta Design Cluster jappoġġja l-iżvilupp tal-ekonomija kreattiva f’Malta, u Tinkering Days jenfasizza d-diversità tal-membri u l-kollaboraturi tiegħu.
Kemm jekk int maker esperjenzat jew kurjuż dwar id-dinja tad-DIY u d-disinn, ingħaqad magħna fl-14 ta’ Settembru waqt Tinkering Days li joffri xi ħaġa għal kulħadd!
