L-Aġenzija Kulturali għall-Belt Valletta, flimkien mad-direttur Malti Olandiż ta’ fama internazzjonali, Lawrence Renes u grupp ta’ artisti u mużiċisti internazzjonali ewlenin, ser jagħtuna interpretazzjoni mill-aqwa ta’ kanzunetti klassiċi fil-produzzjoni Songs of Hope.
Din il-produzzjoni tixxandar fl-1 ta’ Mejju fuq TVM fid-9pm.
Bħala Direttur Artistiku ta’ Songs of Hope, Renes, li reċentament inħatar Ambaxxatur Malti għall-Kultura, qal, “F’dawn iż-żminijiet, aktar u iktar, aħna l-artisti aħna l-ewwel persuni li nirrispondu għall-bżonnijiet emozzjonali u għalhekk naħseb li huwa importanti ħafna li jsiru kunċerti u li n-nies jesperjenzaw l-arti għax hija tant meħtieġa ”.
Dan il-programm mill-qalb, taħt il-patroċinju tal-Eċċellenza Tiegħu Il-President ta’ Malta, fih sett ta’ kanzunetti sbieħ mir-repertorju klassiku fosthom il- Kantiku ta’ Benjamin Britten, ‘My Beloved Is Mine’, ta’ John Dowland, ‘Now, O, Now I Needs Must Part’ u ‘O Solitude’ ta’ Henry Purcell – interpretati mill-kontrotenur Tim Mead waqt li l-mezzo sopran Anna Werle tinterpreta ‘Urlicht’ ta’ Gustav Mahler u ‘Schwipslied ‘ ta’ Johann Strauss.
Is-sopran Elin Rombo ser tesegwixxi ‘Skogen Sover’ ta’ Hugo Alfven u ‘Glitter and Be Gay’ ta’ Leonard Bernstein minn Candide, kif ukoll il-kanzunetta tradizzjonali ‘I Denna Ljuva Sommartid’.
Il-baritonu ta’ Jeremy Carpenter ser jittrasportana lejn dinja oħra permezz ta’ ‘Weep You No More’ ta’ Roger Quilter u ‘Soliloquy’ ta’ Rodgers & Hammerstein minn Carousel.
Il-kantanti ser jingħaqdu kollha flimkien għal ‘Drop, Drop, Slow Tears’ ta’ Orlando Gibbons u ‘You’ll Never Walk Alone’ ta’ Rodgers & Hammerstein minn Carousel.
Il-pjanista Alphonse Cemin ser jinterpreta ‘Meditation on Haydn’s Name’ ta’ George Benjamin u fl-aħħar, il-kantanti kollha flimkien mal-pjanista jagħtuna l-interpretazzjoni tagħhom ta’ ‘Make Our Garden Grow’ ta’ Leonard Bernstein minn Candide.
Id-direzzjoni tal-palk ġiet fdata lill-Ingliż Benjamin Davis li huwa isem internazzjonali fil-qasam tal-produzzjonijiet operistiċi.
[Aktar dettalji dwar Songs of Hope hawn](https://www.vca.gov.mt/mt/blog/music-of-joy-and-hope).
