L-Aġenzija Kulturali għall-Belt Valletta tkompli tibni fuq ix-xogħol li tellgħet matul l-aħħar sena u nofs, biex tipprovdi programm ieħor komprensiv, li jagħti valur akbar lill-kultura Maltija u jkompli jtejjeb il-benesseri tas-soċjetà.
L-Aġenzija Kulturali għall-Belt Valletta tkompli tibni rapport mal-artisti filwaqt li tfassal il-Programm Kulturali tagħha, tipproduċi l-proġetti u tipprovdi opportunitajiet ta’ tkabbir. Fl-istess waqt, l-iżvilupp ekonomiku, xogħolijiet ta’ restawr u l-proġetti infrastrutturali, jkomplu jitwettqu.
Minkejja li l-2020 kienet sena ta’ sfida għal kulħadd, in-nies gawdew dak kollu li għandha x’toffri l-Belt, inkluż il-Programm Kulturali tal-Aġenzija. L-Aġenzija tellgħet proġetti għal udjenzi ta’ daqs medju kif ukoll attivitajiet intimi; proġetti li inkludew diskussjonijiet u masterclasses ma’ professuri u ismijiet kbar fil-qasam kulturali internazzjonali; wirjiet ta’ arti viżiva, films, mużika fil-miftuħ u attivitajiet għall-familja kollha fosthom il-Valletta Green Festival. Ikkollaborajna ma’ numru ta’ entitajiet fosthom l-Orkestra Filarmonika ta’ Malta u ŻfinMalta, t-Teatru Manoel, Ċinerabilja, Muża, is-Suq tal-Belt, l-Awtorità Maltija għat-Turiżmu, Festivals Malta u numru ta’ organizzazzjonijiet artistiċi u individwi, fost l-oħrajn.
Il-Ministru għall-Wirt Kulturali, l-Arti u l-Gvern Lokali Jose Herrera qal, “Il-Gvern jemmen li l-Aġenzija Kulturali għall-Belt Valletta hija intrinsika għax-xoghol tal-artisti u hija importanti aktar minn qatt qabel. Id-dinja tagħna, teħtieġ il-poter li għandha l-arti biex issib is-serħan u t-tama. L-arti tista’ tkun katalist f’din il-battalja importanti”.
Iċ-Ċermen tal-Aġenija Jason Micallef tenna, “L-Aġenzija Kulturali għall-Belt Valletta tibqa’ tisħaq li l-kultura mhix lussu, imma neċessità. Dan il-programm ambizzjuż u eċċitanti huwa xhieda tal-impenn tagħna lejn l-arti u l-kultura. B’ottimiżmu kbir, ninsabu ħerqana għal din is-sena li għadna kif bdejna”.
Il-Kap Eżekuttiv tal-Aġenzija, Catherine Tabone saħqet, “Matul is-sena li għaddiet, ir-rilevanza tal-arti saret tinħass ħafna aktar. Għall-2021, l-Aġenzija Kulturali għall-Belt Valletta qed issaħħaħ ix-xogħol tagħha mal-artisti u mal-komunità biex tippreżenta programm b’saħħtu bis-sehem ta’ artisti Maltin u internazzjonali li jaħdmu flimkien f’xelta wiegħsa ta’ produzzjonijiet li joffru doża bżonnjuża ta’ kreattività f’dawn iż-żminijiet diffiċli”.
Il-kollaborazzjonijiet ma jieqfux u fil-ġimgħat li ġejjin ser nesperjenzaw uħud minnhom, fosthom: kunċert ta’ Tatiana Lisnic, u prestazzjoni oħra ta’ Brian Schembri bħala parti mis-serje Beethoven at Home.
Ikompli wkoll il-proġett ta’ fotografija TNAX filwaqt li ser joħorġu numru ta’ sejħiet biex artisti minn ġeneri varji jerġgħu jkunu parti mill-Programm tagħna.
Fi Frar, l-Aġenzija Kulturali għall-Belt Valletta qed terġa tniedi s-sejħa bħala parti mill-Programm tal-artisti f’residenza.
F’Marzu, Written on Skin, xogħol tal-kompożitur Ingliż George Benjamin li rebaħ unuri kbar, ser jiġi eżegwit mill-Orkestra Filarmonika ta’ Malta flimkien ma’ ħames solisti internazzjonali, taħt id-direzzjoni ta’ Lawrence Renes.
Il-proġetti ta’ Strada Stretta Concept, li d-Direttur Artistiku tagħha huwa l-Profs. Giuseppe Schembri Bonaci ikomplu u fost l-oħrajn għandna nistennew lejla ta’ mużika jazz mill-Kwartett ta’ Sammy Murgo, u rappreżentazzjoni ta’ Le Pauvre Matelot mill-grupp teatrali Franċiż, Arcal Lyrique.
Lejn l-aħħar ta’ Marzu u l-bidu ta’ April ser jittellà d-dramm Vari bbażat fuq in-novella ta’ Trevor Zahra.
