Organizzat mill-Aġenzija Kulturali għall-Belt Valletta, dan l-avveniment se jinkludi t-tnedija tal-kanzunetta l-ġdida ta’ SterjoTipi għall-Milied 2020, Oażi.
Bħala parti mill-kunċert ta’ sagħtejn li se jsir fi Pjazza Assedju l-Kbir (quddiem il-Qorti), se jindaqqu bosta kanzunetti popolari ta’ SterjoTipi fosthom; BELTi, Tabib, Ħajja ta’ Xejn, Int u Jien, Mostri, u URINI. Iffurmata f’Ottubru 2017, SterjoTipi hija band magħrufa għall-kanzunetti bil-Malti, li ilha fix-xena mużikali Maltija għal madwar għaxar snin. Il-band hija magħmula minn Mark M Costa [front man u keyboardist], Stefan Grech [lead guitarist], Roderick Borg [drummer] u Gabrijel Mansueto [bass guitarist u backing vocals]. Kanzunetti popolari bħal ‘Belti’, ‘Int u Jien’, ‘Mostri’ u ‘Urini’ laħqu mat-300,000 view fuq YouTube u l-band kontinwament tidher fiċ-charts tal-mużika Maltija.
SterjoTipi bħalissa jinsabu f’fażi ta’ kitba ta’ kanzunetti u se joħorġu diversi numri ġodda fl-2021. Huma qed jippjanaw li jniedu album ġdid fiż-żmien li ġej.
Żur [il-paġna ta’ Facebook](https://www.facebook.com/vallettaculturalagency) jew il-websajt tal-aġenzija (www.vca.gov.mt) għall-programm sħiħ.
