Kadenza ta’ Ħolma: Requiem Kalendarju hija prestazzjoni intima li se tittella’ minn The Strada Stretta Concept, fi ħdan l-Aġenzija Kulturali għall-Belt Valletta, bħala l-avveniment finali għall-kalendarju tal-2020.
Kadenza ta’ Ħolma se tixxandar live fuq il-paġna ta’ Facebook ta’ The Strada Stretta Concept fil-15 ta’ Diċembru fit-20:00, minn The Splendid fi Strada Stretta fil-Belt Valletta. Dan l-avveniment uniku se jippreżenta taħlita ta’ arti, poeżija u mużika li se tieħu lill-udjenza virtwali fuq vjaġġ katartiku tul it-tnax-il xahar ta’ sena.
Iċ-ċiklu ta’ poeżiji li fuqu huwa bbażat l-avveniment huma x-xogħol oriġinali tad-Direttur Artistiku ta’ The Strada Stretta Concept, Giuseppe Schembri Bonaci. Il-kollezzjoni hija f’varjetà ta’ lingwi inkluż il-Malti, l-Ingliż u r-Russu. Ix-xogħol jieħu ispirazzjoni minn direzzjonijiet varji fosthom l-Għana, il-poeżija Maltija, il-kultura medjevali Ewropea tat-trovaturi, kif ukoll mix-xogħlijiet ta’ figuri letterarji prolifiċi bħal William Shakespeare, Arthur Rimbaud, Cesare Pavese, Pablo Neruda, u Boris Pasternak. Din se tkun l-ewwel darba li l-ġabra ta’ poeżiji se tiġi ppreżentata lil udjenza.
Il-kompożizzjoni mużikali ta’ Karl Fiorini hija bbażata fuq iċ-ċiklu ta’ poeżiji miktuba minn Schembri Bonaci. Il-vuċi ewlenija tal-kompożizzjoni se ssir mill-mezzo sopran Clare Ghigo, li sservi bħala l-vuċi personali tal-poeta kif ukoll il-vuċi tas-subkonxju tiegħu. Is-Soprani Francesca Aquilina u Mariele Zammit se jkunu qed isaħħu l-istruttura poetika u mużikali tal-kompożizzjoni. Mariele Zammit se tkun qed iżżid ukoll interpretazzjoni mill-ġdid tal-poeżiji fil-forma ta’ Għana, li hija fundamentali għall-prassi kreattiva ta’ Schembri Bonaci. Takkumpanja l-vokali kollha se jkun hemm Maria-Elena Farrugia fuq il-pjanu. Barra minn hekk, il-prestazzjoni se tinkludi wkoll projezzjonijiet ta’ pitturi mill-artista bbażata f’Pariġi, Ġoxwa Borg. Bla dubju, wieħed jista’ jistenna li din il-prestazzjoni tkun personali ħafna u jkollha sens ta’ vulnerabblità.
Kadenza ta’ Ħolma se tixxandar live fuq il-paġna ta’ Facebook ta’ The Strada Stretta Concept. Biex issir taf aktar, segwi l-paġni The Strada Stretta Concept u Valletta Cultural Agency fuq Facebook. L-attendenza għall-live stream ta’ Kadenza ta’ Ħolma hija bla ħlas.
