Bejn it-8 u l-24 ta’ Diċembru, Ittanta Ktieb (Blind Date with a Book) jipprovdi kotba mkebba f’kabini tat-telefonija bħala rigali lil min ikun għaddej.
Dan il-proġett qed jiġi organizzat mill-Aġenzija Kulturali għall-Belt Valletta bħala parti mill-Programm Milied fil-Belt bl-għan li tinkoraġġixxi lin-nies jesperimentaw u jaqraw kotba li mhux is-soltu jaqraw jew jixtru. Din hija parti minn inizjattiva globali li tippromwovi l-letteratura u kittieba Maltin.
Il-kotba, li huma kollha rebbieħa ta’ unuri prestiġġjużi, huma kollha ta’ awturi Maltin fosthom wieħed tal-mibki Oliver Friggieri.
Ittanta Ktieb qed titellà f’kabini tat-telefonija varji fi Triq ir-Repubblika, l-Belt Valletta bejn is-6pm u t-8.30pm, sa lejlet il-Milied.
Il-Programm Milied fil-Belt tal-Aġenzija Kultuarli għall-Belt Valletta, qed iseħħ bejn it-8 u l-24 ta’ Diċembru fil-pjazez prinċipali, postijiet strateġiċi u t-toroq pittoreski tal-Belt Valletta. Id-dwal tal-Milied u d-dekorazzjonijiet jistgħu jitgawdew sal-ewwel ġimgħa ta’ Jannar.
Żur il-paġna ta’ Facebook jew il-websajt tal-aġenzija (www.vca.gov.mt) għall-programm sħiħ.
Sabiex din l-esperjenza tkun sikura għall-kulħadd, nappellaw biex imiss biss il-ktieb li jkun se jieħu. Il-miżuri ta’ mitigazzjoni kontra l-Covid 19 għandhom jiġu segwiti dejjem.
