Din il-kanzunetta, oriġinarjament tal-grupp Journey, hija assoċjata ħafna mal-pandemija hekk kif sptarijiet madwar id-dinja daqqew din id-diska waqt li kienu qed jibagħtu lil dawk li fiequ lura lejn id-dar. Wara l-vidjows ‘Where the Streets Have No Name’ u ‘Valletta, A City Like No Other in the World’, dan il-vidjow għandu l-għan li jwassal messaġġ ta’ pożittività, ispirat mill-esperjenzi riċenti li kellhom persuni Maltin bil-Covid 19.
Iċ-Ċermen Eżekuttiv tal-MPO, Sigmund Mifsud, stqarr li l-proġett huwa partikolarment adattat fid-dawl tat-tneħħija tar-restrizzjonijiet. Hu qal li, “għandna ningħaqdu kollha flimkien u naħdmu lejn future aħjar, u dan jippermettilna negħlbu kwalunkwe xkiel”. Iċ-Ċermen irringrazzja lill-imsieħba tal-orkestra, li taw il-kontribut tagħhom lejn l-impenn kontinwu tal-MPO lejn l-arti u l-kultura.
Iċ-Ċermen tal-VCA, Jason Micallef, qal li “Waqt dawn iż-żminijiet diffiċli, xtaqna nwasslu messaġġ ta’ tama lil dawk li ġew affetwati l-aktar mill-Covid-19, li s-sitwazzjoni se tmur għall-aħjar. Aħna nemmnu f’dan il-messaġġ pożittiv hekk kif Malta qed timxi ‘l quddiem, grazzi għall-impenn tal-pubbliku u l-Awtoritajiet tas-Saħħa li rnexxielhom iżommu l-virus taħt kontroll, li wassal għal sitwazzjoni li issa hija stabbli.”
Il-proġett huwa serje ta’ inizjattivi ppreżentati bħala parti mill-Programm Online tal-MPO.
