L-Aġenzija Kulturali għall-Belt Valletta ppubblikat rapport maħruġ mill-KPMG li jħares lejn l-impatt li ħalliet Valletta 2018, il-Kapitali Ewropea tal-Kultura. L-eżitu tar-rapport tħabbar illum waqt konferenza tal-aħbarijiet li saret ġewwa l-MUŻA.
Ir-rapport juri li Valletta 2018 ħalliet impatt ekonomiku totali ta’ aktar minn €325M u ġġenerat investiment totali ta’ €678M fl-ekonomija Maltija. Kienet irreġistrata wkoll żieda ta’ 2.23% fil-Prodott Domestiku Gross.
L-impatt pożittiv li ħalliet il-Kapitali Ewropea tal-Kultura nħass sew qalb il-komunità tan-negozju ġewwa l-Belt Valletta, hekk kif il-Belt kellha żieda fin-numru ta’ turisti li żaruha grazzi għall-isforzi li saru mill-Fondazzjoni Valletta 2018 bil-kollaborazzjoni ta’ entitajiet oħra. Il-Belt Valletta rreġistrat żieda ta’ ‘l fuq minn 350,000 turist fl-2018, biex b’hekk rat total ta’ 2,600,000 turist matul is-sena li fiha kienet Kapitali Ewropea tal-Kultura.
Inħolqu 8,000 impjieg f’numru ta’ setturi differenti marbuta mal-Kapitali Ewropea tal-Kultura, inkluż il-kreattività, l-ospitalità, il-patrimonju, is-servizzi tat-Teknoloġija tal-Informatika u t-trasport, inkluż dak bil-baħar.
Il-Kapitali Ewropea tal-Kultura wasslet ukoll għal riġenerazzjoni infrastrutturali estensiva ġewwa l-Nelt, fosthom il-ftuħ tal-MUŻA (il-Mużew tal-Arti), ir-riġenerazzjoni ta’ Pjazza Tritoni, Strada Stretta u s-Suq l-Antik, kif ukoll ir-restawr ta’ Palazzo Ferreria u l-faċċata tal-Knisja tal-Ġiżwiti, fost binjiet oħrajn.
Waqt li indirizza lil dawk preżenti, il-Ministru għall-Wirt Nazzjonali, l-Arti u l-Gvern Lokali José Herrera tenna kif dan jawgura tajjeb u huwa eżempju ta’ kif l-investiment fil-qasam kulturali jista’ jħalli tassew impatt pożittiv u legat għal pajjiżna. Sostna wkoll li bħala Ministru responsabbli mill-Wirt Nazzjonali, l-Arti u l-Gvernijiet Lokali, “flimkien magħkom l-imsieħba soċjali rridu nibqgħu impenjati u nassiguraw li l-Belt Valletta tibqa’ l-belt kulturali, il-belt tal-arti, il-belt tal-kreattività dejjiema… pero fuq kollox il-Belt tal-Beltin“.
Iċ-Ċermen tal-Aġenzija Kulturali għall-Belt Valletta Jason Micallef qal li, “is-suċċess tar-riżultati fil-konklużjoni ta’ dan l-istudju juru li dak li nħoloq fl-2018 baqa’ għaddej b’momentum fl-2019. Dan hu l-legat li kien parti mill-pjan ta’ għalfejn inħolqot l-Aġenzija Kulturali għall-Belt Valletta fi tmiem Valletta 2018”.
L-idea ta’ ‘ko-kreazzjoni’ u l-involviment ta’ membri tal-komunità u l-pubbliku fil-Programm Kulturali tal-Kapitali Ewropea tal-Kultura, li kienet minn ta’ quddiem fuq l-aġenda tal-Fondazzjoni Valletta 2018, wasslet għal għarfien pubbliku dwar is-settur kulturali bla preċedent, kif ukoll nisġa kulturali akbar minn qatt qabel.
Ir-rapport jixhed ukoll li Valletta 2018 ħalliet legat b’saħħtu li permezz tiegħu issa qed jitwettaq ix-xogħol tal-Aġenzija Kulturali għall-Belt Valletta. Din tal-aħħar twaqqfet f’April tal-2019 bil-għan li ssostni u ssaħħaħ il-ħajja kulturali vibranti tal-Belt Valletta permezz tal-ħolqien ta’ programm kulturali ta’ avvenimenti kreattivi kull sena.
