Spazju Kreattiv b’kollaborazzjoni mal-Aġenzija Kulturali għall-Belt Valletta, u l-Ministeru għal Għawdex qed jistiednu kreattivi internazzjonali minn oqsma differenti biex japplikaw għal programm immersiv u bbażat fil-komunità għas-sejħa għar-residenza tal-artisti għall-2023. It-tul jista’ jvarja minn tliet (3) sa erba’ (4) ġimgħat għal proġetti ta’ residenza li jseħħu bejn Jannar – Diċembru 2023.
Dawn ir-residenzi huma bbażati fil-kuntest tal-viżjoni strateġika ta’ Spazju Kreattiv u x-xena kreattiva kulturali dejjem tikber f’Malta kif ukoll mal-missjoni tal-VCA li ssostni u ssaħħaħ il-ħajja kulturali vibranti tal-belt kapitali permezz tal-ħolqien ta’ avvenimenti kreattivi żviluppati b’kollaborazzjoni ma’ artisti, komunitajiet u Organizazzjonijiet Kulturali Pubbliċi oħra. Il-programm huwa żviluppat f’konformità mal-mandat taż-żewġ organizzazzjonijiet li jkunu katalisti tal-espressjoni kontemporanja, mal-legat ta’ Valletta 2018 – Il-Belt Kapitali Ewropea tal-Kultura u mal-istrateġija tal-Kunsill Malti għall-Arti.
F’qafas bħal dan, il-programm ta’ residenza tagħna għandu l-għan li jarrikkixxi d-diversità kulturali fix-xena kreattiva nazzjonali billi jinkoraġġixxi laqgħat u skambji bejn artisti internazzjonali u Maltin, il-kollaboraturi kreattivi u l-komunitajiet kif ukoll l-ambjenti fiżiċi u virtwali. Il-qafas tar-residenza se jipprovdi l-ħin għar-riċerka u l-iżvilupp tal-proġett kif ukoll opportunitajiet biex jimpenjaw ruħhom mal-komunitajiet fil-preżentazzjoni tax-xogħol.
Dawk interessati japplikaw għal din is-sejħa jistgħu japplikaw għal dawn il-fergħat tal-Programm ta’ Residenza tal-Artisti li ġejjin:
__**Residenza tal-Artisti b’kollaborazzjoni mal-Valletta Design Cluster**__
Tul tar-Residenza: 3-4 ġimgħat
Post tar-Residenza: Valletta Design Cluster, il-Belt Valletta, Malta
Numru ta’ Residenzi: 3 (massimu)
Spazju Kreattiv b’kollaborazzjoni mal-Aġenzija Kulturali għall-Belt Valletta (VCA) qed ifittex proposti għal residenzi fil-Valletta Design Cluster fi spazju komunitarju għal prattika kulturali u kreattiva li jinsab fil-bini tal-Biċċerija l-Antika (Il-Biċċerija) rinnovat fil-Belt Valletta. Ir-residenzi huma mmirati prinċipalment iżda mhux esklussivament lejn artisti u kreattivi mill-pajjiżi Global South /Euromed/MENA. Se tingħata preferenza lill-applikazzjonijiet li jittrattaw id-disinn, l-innovazzjoni fl-artiġjanat, it-tnaqqis tal-lakuni kulturali, l-intraprenditorija kulturali, id-disinn u t-teknoloġija tal-ikel, il-benessri soċjali, it-tfassil tal-post u l-ippjanar urban.
Dawn ir-residenzi se jfittxu li jipprovdu opportunitajiet lill-artisti fir-residenza biex jikkollaboraw ma’ komunitajiet lokali speċifiċi li għandhom interess kondiviż fit-tradizzjonijiet li ilhom jeżistu, xejriet soċjali u prattiki kreattivi kontemporanji, inkluż impenn mal-kultura materjali, l-ispazju urban, u prattiċi tal-post. Artisti / kreattivi se jkollhom l-opportunità li jużaw il-faċilitajiet tal-Valletta Design Cluster, inkluż tagħmir ta’ fabbrikazzjoni diġitali, faċilitajiet ta’ kooperazzjoni, kmamar tal-laqgħat / workshops, spazju tal-ikel, u żoni pubbliċi inkluż il-ġnien tas-saqaf tagħha.
Kull residenza tista’ takkomoda sa żewġ (2) artisti / prattikanti kollaboraturi, iċċentrati madwar proġett / tema ewlenija identifikata b’mod ċar. Fejn l-applikant huwa iktar minn artist / prattikant wieħed, jeħtieġ li tiġi pprovduta ġustifikazzjoni li turi kif it-tema identifikata se tkun indirizzata b’mod multidixxiplinarju multi-perspettiva. Fil-każ ta’ 2 individwi li ġejjin mill-istess organizzazzjoni/kollettiv, ir-rwoli rispettivi fi ħdan il-proġett propost jeħtieġ li jiġu ċċarati fl-istadju tal-applikazzjoni.
__**2. Residenza tal-Artisti f’Għawdex f’kollaborazzjoni mal-Ministeru għal Għawdex.**__
Tul tar-Residenza: 3-4 ġimgħat
Post tar-Residenza: Għawdex
Numru ta’ Residenzi: 2
Dawk il-proġetti ta’ residenza li jsiru f’Għawdex, għandhom jiġu żviluppati fi ħdan komunità mill-qrib, u huma maħsuba biex jimmassimizzaw l-immersjoni kulturali fil-gżira u l-komunitajiet tagħha. Proġetti magħżula għandhom iqisu t-tradizzjonijiet u l-fora soċjali tal-gżira, u fil-proċess jesploraw opportunitajiet għal skoperti kulturali u kreattivi.
Kull residenza tista’ takkomoda sa żewġ (2) artisti / prattikanti kollaboraturi, iċċentrati madwar proġett / tema ewlenija identifikata b’mod ċar. F’każijiet fejn il-proposta tinkludi aktar minn artist / prattikant wieħed, jeħtieġ li tiġi pprovduta ġustifikazzjoni li turi kif it-tema identifikata se tkun indirizzata b’mod multidixxiplinarju multi-perspettiva.
__**Prijoritajiet tal-Programm ta’ Residenza tal-Artisti**__
L-applikazzjonijiet se jiġu kkunsidrati b’rabta mal-viżjoni strateġika ġenerali ta’ Spazju Kreattiv fejn hija iċċentrata fuq l-Eċċellenza Artistika, il-Ħidma fil-Komunità u l-Internazzjonalizzazzjoni kif ukoll l-missjoni tal-Aġenzija Kulturali għall-Belt Valletta li ssostni u ssaħħaħ il-ħajja kulturali vibranti tal-belt kapitali permezz tal-ħolqien ta’ avvenimenti kreattivi żviluppati b’kollaborazzjoni ma’ artisti, komunitajiet u Organizzazzjonijiet Kulturali Pubbliċi oħra. Tingħata prijorità lil dawk l-applikanti li jfittxu li:
– jikkollaboraw b’mod dirett u attiv mal-komunitajiet u l-kulturi lokali;
– lesti li jinteraġixxu / jagħmlu netwerk produttiv ma’ kreattivi u / jew organizzazzjonijiet Maltin;
– jaħdmu f’kuntest li jirrelata direttament mal-programm/i elenkat/i ta’ Spazju Kreattiv u/jew VCA;
– jippreżentaw forom kreattivi li bħalissa qed jitfaċċaw jew mhumiex rappreżentati biżżejjed f’Malta u Għawdex.
L-applikazzjonijiet se jiġu evalwati skont diversi kriterji, bħall-eċċellenza artistika, il-portafoll kreattiv, u r-rilevanza tal-proġett għall-kuntesti soċjo-politiċi attwali; ħidma fost l-komunità u involviment tal-udjenza, b’attenzjoni speċjali fuq udjenzi mhux daqstant rappreżentati, u l-involviment tal-kreattivi lokali; internazzjonalizzazzjoni u kollaborazzjoni mal-kontropartijiet internazzjonali; u ċarezza ġenerali dwar il-proposta (bħal iżda mhux limitat għal; miri tal-proġett, temi, pjan ta’ azzjoni, każ għal appoġġ, tqassim tal-baġit, u mezzi ta’ finanzjament).
Kundizzjonijiet:
Spazju Kreattiv, b’kollaborazzjoni mal-VCA u l-Ministeru għal Għawdex ser jipprovdi lil dawk magħżula:
Akkomodazzjoni (il-post għar-residenza f’Għawdex jiġi ddeterminat fi stadju aktar tard);
Trasferimenti mill-ajruport;
Sussistenza ta’ kuljum;
Allowance għall-proġett;
Assistenza professjonali fil-koordinazzjoni u l-iżvilupp tal-inizjattiva;
Promozzjoni tal-proġett ta’ residenza fuq pjattaformi onlajn.
L-ispejjeż tat-titjira lejn Malta u lura huma responsabbiltà tal-applikanti magħżula u għandhom jiġu bbukjati wara konsultazzjoni ma’ Spazju Kreattiv. Kull ħaġa mhux imsemmija hawn fuq se jkollha tkun koperta mill-artisti magħżula.
Dati Importanti:
Is-sejħa tiftaħ: l-Erbgħa 13 ta’ April, 2022
Is-sejħa tagħlaq: l-Erbgħa 18 ta’ Mejju, 2022
Deċiżjonijiet ikkomunikati sal-Erbgħa 15 ta’ Ġunju, 2022
Agħfas il-link biex tapplika: https://www.kreattivita.org/en/artists-residency/air-2020-application/
Iktar informazzjoni:
Viżjoni Strateġika ta’ Spazju Kreattiv:
https://www.kreattivita.org/en/call/#strategic-vision
Qafas tal-Programm ta’ Residenza tal-Artisti ta’ Spazju Kreattiv u residenzi tal-passat: http://www.kreattivita.org/en/artists-residency/
Valletta Design Cluster:
https://www.vca.gov.mt/en/valletta-design-cluster
Il-Kunsill Malti għall-Arti:
https://www.artscouncilmalta.org/
